Ubat Gampong

Ubat Gampong

Karya T.A. Sakti

Assalamu’alaikum warahmatullah

Sambot meutuwah saleuem mulia

Nibak siseun nyoe napeue lon peugah

Harap beuceudah ngon samporeuna

Keu ubat gampong bacut takisah

Lon meubeurakah meudua banja

Ubat Endatu watee ka sudah

Hansoele papah jameun ka bida

Jinoe ka canggeh ubat that mudah

Hana that payah bak tajak mita

Asai beuna peng nyang on-on mirah

Meuh’ei sileupah ubat kiminya

Di ureueng gampong sabe lam susah

Seureuba salah ‘ohtee geukira

Ubat that meuh’ei pade that murah

Peunyaket jajah hana bak tunda

Endatu tanyoe meunoe geupeugah

Boh GADONG, BIRAH, KUMILI tiga

Lam sithon sigo pajoh beubagah

Ube na wabah cit hanco dumna

Dumpeue peunyaket Tuhan peusiblah

Ngon Insya Allah bahthat Corona!

Gule bak Leubue tataguen kuwah

Lam sithon beusah siblet tapeuna

Geukrut putik U peh lada siblah

Tipek beubagah nibak dhoe gata

‘Oh saket ulee sang-sang ka beukah

Deungon Bismillah mustajeueb raya!

Jan saket batok khak-khok sileupah

Mita beubagah on rabon muda

Ramah deungon ie peujeb sikhan glah

Ngon Insya Allah pulehle teuma

                                                                                         1

Kadang saket pruet na angen mirah

Gambe cok siblah tabicah sigra

Ta upa bak pruet ngat diruet bagah

Ab- eb bak babah t’ang-t’eung lungkiek pha

Ngon boh keumeudee pih teuntee leupah

Le angen mirah pruet ureueng tuha

Keumadee masak syulok keu lincah

Bahthat bee babah geuntoet that subra

Kadang na kurab lungkiek pha ceudah 

Meunye na mudah on Drang* neumita

Ngon Gapu Ranub neupeh beubicah

Neu intho bagah dalam luengkiek pha

Meunye na teuceue wab le seumeurah

Gambe nyang mirah laju neu upa

Ngon on Sikleueng-kleueng pih mustajabah

Sayang sileupah bak jih ka langka

Dum kayee ubat tamita susah

Dilee Unsyiah na geuci pula

Jiteukale khueng panyang sileupah

Lampoh nyang luwah ka “talo” sigra!

Jinoe di UTU meusyuhu meugah

Lampoeh that luwah Herbal geupula

Seumoga udep beumaju bagah

Pabrek ngon ulah patoet geupeuna!

• 0n Drang: di Pidie = on Drang Linggang.

di Aceh Besar = on Linggang.

* T.A. Sakti, Peminat manuskrip dan sastra Aceh